ހައްޖުވެރިންގެ ސަލާމަތަށް ހައްޖު ކޯޕަރޭޝަނުން 24 ގަޑިއިރު މޮނިޓަރކުރާނެ : ޝަކީލް

ހައްޖުވެރިންގެ ސަލާމަތަށް ހައްޖު ކޯޕަރޭޝަނުން 24 ގަޑިއިރު މޮނިޓަރކުރާނެ ކަމަށް ހައްޖު ކޯޕަރޭޝަންގެ އެމްޑީ މުހައްމަދު ޝަކީލް ވިދާޅުވެއްޖެއެވެ.

މި އަހަރުގެ ހައްޖުގެ އަޅުކަމަށް ދިވެހި ހައްޖުވެރިން މައްކާއިން މިނާއަށް ދަތުރުކުރަން ފެށި ހިސާބުން ފެށިގެން، ހައްޖުވެރިންގެ ސަލާމަތާއި ރައްކާތެރިކަން ކަށަވަރުކުރުމަށް ހައްޖު ކޯޕަރޭޝަންގެ މާލޭ ހެޑް އޮފީހުގެ މުވައްޒަފުން 24 ގަޑިއިރު ޝިފްޓް ޑިއުޓީގައި މަސައްކަތްކުރަމުންދާ ކަމަށް އެ ކޯޕަރޭޝަންގެ މެނޭޖިންގ ޑިރެކްޓަރ ވިދާޅުވެއްޖެއެވެ.

ހައްޖު ކޯޕަރޭޝަނުން މިކަން ކުރިއަށް ގެންދަނީ ހައްޖުވެރިންގެ ލޮކޭޝަން ދެނެގަތުމާއެކު، އެ ފަރާތްތަކުގެ ސަލާމަތާއި ރައްކާތެރިކަން ކަށަވަރުކުރުމުގެ ގޮތުންނެވެ. މި ގޮތުން އެއްވެސް ހައްޖުވެރިއަކު ކަނޑައެޅިފައިވާ ސަރަހައްދުން ބޭރަށް ނުކުމެއްޖެނަމަ، އެ ހައްޖުވެރިއަކާ ގުޅައި އެ ފަރާތުގެ ހާލު ބަލައި، ސަލާމަތާއި ރައްކާތެރިކަން ކަށަވަރުކުރެވޭނެ ކަމަށް އެމްޑީ ވިދާޅުވިއެވެ.

އަދި ހައްޖުވެރިންގެ ތެރެއިން އެއްވެސް ފަރާތަކަށް އެހީތެރިކަމެއް ބޭނުންވެއްޖެ ހާލަތެއްގައި، ސައުދީ އަރަބިއްޔާގައި ތިބި އެހީތެރިން މެދުވެރިކޮށް އެ ފަރާތްތަކަށް އެހީތެރިކަން ފޯރުކޮށްދެވޭނެ ކަމަށްވެސް އެމްޑީ ފާހަގަކުރެއްވިއެވެ.

ހައްޖު ކޯޕަރޭޝަނުން މި ފަދަ ޚިދުމަތެއް ފޯރުކޮށްދިނުމަކީ ހައްޖުވެރިންނަށް އިތުރު ޔަގީންކަމަކާއި ރައްކާތެރިކަމެއް ލިބިގެންދާނެ ކަމެއް ކަމަށް ބެލެވެއެވެ. ޚާއްޞަކޮށް ހައްޖުގެ އަޅުކަން އަދާކުރުމަށް ގިނަ އަދަދެއްގެ މުސްލިމުން އެއްތަނަކަށް އެއްވެވާ ދަނޑިވަޅެއްގައި މި ފަދަ ނިޒާމެއް ޤާއިމްކުރެވިފައި އޮތުމަކީ މުހިންމު ކަމެކެވެ.