ހަށިގަނޑު ޕޯސްޓްމޯޓަމް ހެދުމަށް ނިންމައިފި

އއ. މާޅޮހުގައި އުމުރުން ދުވަސްވީ މީހަކަށް ހަމަލާދީ މަރާލި މައްސަލައިގައި، އޭނާގެ ހަށިގަނޑު ޕޯސްޓްމޯޓަމް ހެދުމަށް ނިންމާފައިވާ ކަމަަށް ފުލުހުން ބުނެފިއެވެ.

ފުލުހުން ބުނީ، މަރާލާފައިވަނީ، އެ ރަށު އޯކިޑްމާގެ އަބްދުއްރަހްމާން އާދަމް (65އ.) ކަމަށެވެ.

އެއާއެކު ފުލުހުން ބުނީ ތަހުގީގަށް ބޭނުންވާ ތަހުލީލުތައް ހެދުމަށް އޭނާގެ ހަށިގަނޑު މާލެ ގެނައުމުގެ މަސައްކަތް މިހާރު ކުރަމުންދާކަމަށާއި، ހަށިގަނޑު ޕޯސްޓްމޯޓަމް ހެދުމަށް ނިންމާފައިވާ ކަމަށެވެ.

ފުލުހުން ބުނީ އަބްދުއްރަހްމާން އަށް ހަމަލާދީފައިވަނީ އޭނާ ނިދާފައި އޮއްވާކަމަށާއި އޭނާ ނިޔާވެފައިވަނީ ސިއްހީ މަރުކަޒުގައި ފަރުވާދެމުން ދަނިކޮށް ކަމަށެވެ. މައުލޫމާތު ލިބިފައިވާ ގޮތުން އަބްދުއްރަހްމާން މަރާލާފައި ވަނީ އޭނާގެ ބޮލަށް ހަމަލާދީގެންނެވެ. އޭނާގެ ބޮލަށް ދިން ހަމަލާތަކުގެ ސަބަބުން ބޮލުގެ ބޮޑުބައި ޗިސްވެފައިވާ ކަމަށް މައުލޫމާތު ލިބެއެވެ.

މި މައްސަލައާއި ގުޅިގެން މާލެއިން ތަހުގީގު ޓީމެއް އެ ރަށަށް ގޮސްފައިވާއިރު ފުލުހުން ބުނީ އެ ރަށަށް އަރާ ފޭބުން މަނާކޮށްފައިނުވާ ކަމަށާއި އެހެންނަމަވެސް ރަށަށް އަރާ ފައިބާ މީހުން މޮނީޓާކުރަމުން އަންނަކަމަށެވެ.

މި މައްސަލައާއި ގުޅޭ އިތުރު ތަފްސީލެއް ފުލުހުން ހާމަކޮށްފައި ނުވާއިރު، ފުލުހުން ބުނީ މި ހާދިސާ އާއި ގުޅޭ ގޮތުން ބަލަންޖެހޭ ކަންކަން ބަލަމުން އަންނަ ކަމަށެވެ.