ޑްރޯން ހަރަކާތްތަކާއެކު ބޭއްވި އާ އަހަރުގެ ފެސްޓިވަލަށް ތަރުހީބެއް!

2025 ވަނަ އަހަރަށް މަރުހަބާ ކިޔުމުގެ ގޮތުން ހަވާ އެރުވުމުގެ ކުލަ ގަދަ ހަރަކާތްތަކަކާއެކު "މޯލްޑިވްސް ކަލްޗަރ އެންޑް ފުޑް ފެސްޓިވަލް" ފަށައިފިއެވެ.

މޯލްޑިވްސް މަރކެޓިންގ އެންޑު ޕަބްލިކް ރިލޭޝަންސް ކޯރޕަރޭޝަން، އެމްއެމްޕީއާރުސީގެ އިސްނަގައިގެން، ސަރުކާރުގެ ވުޒާރާތަކާއި އިދާރާތައް އަދި އަމިއްލަ ގިނަ ފަރާތްތަކެއްގެ ބައިވެރިވުމާއެކު ހުޅުމާލެ ސެންޓަރެލް ޕާކުގައި ކުރިއަށްދާ މި ފެސްޓިވަލް ފެށުމަށް ބޭއްވި ޝޯވ ބަލާލުމަށް އާއްމުންގެ ގިނަ ބަޔަކު ޖަމާވިއެވެ.

މި ހަރަކާތްތައް ބައްލަވާލެއްވުމަށް ފަތުރުވެރިކަމާބެހޭ ވަޒީރު އަހުމަދު ފައިސަލްއާއި މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ)ގެ މެނޭޖިން ޑިރެކްޓަރ އިބްރާހިމް ޝިޢުރީވެސް ވަޑައިގެންނެވިއެވެ.

މި ފެސްޓިވަލުގެ ތެރެއިން ކުރިއަށްދިޔަ ޑްރޯން ޝޯވގައި ރާއްޖޭގެ ސަޤާފަތާއި ރީތިކަން ދައްކުވައިދީފައިވެއެވެ. އަދި ބޮޑުބެރުގެ ހުށަހެޅުންތަކާއި، ދަފި ނެގުން ފަދަ ޝައުގުވެރި ސަގާފީ ހަރަކާތްތައްވެސް މި ފެސްޓިވަލުގައި ކުރިއަށްދިޔައެވެ. މީގެއިތުރުން އައު އަހަރަށް މަރުހަބާ ކިޔުމުގެ ގޮތުން، ދަންވަރު 12:00 ޖެހުމާއެކު ވަނީ ހަވާ އަރުވާފައެވެ.