ޔޫއެން އޯޝަން ކޮންފަރެންސްގައި ރާއްޖެ ތަމްސީލުކުރައްވަނީ ވަޒީރު ޝިޔާމް

ޔޫއެން އޯޝަން ކޮންފަރެންސްގައި ރާއްޖެ ތަމްސީލުކުރައްވަނީ މިނިސްޓަރު ޝިޔާމްއެވެ.

ޕޯޗުގަލްގެ ވެރިރަށް ލިސްބަންގައި މިހާރު ކުރިއަށްދާ އދ. ގެ ތިންވަނަ އޯޝަން ކޮންފަރެންސް (ޔޫއެންއޯސީ3)ގެ އިފްތިތާހީ ޖަލްސާގައި ދިވެހިރާއްޖެ ތަމްސީލުކުރައްވަނީ މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ އަލްފާޟިލް އަޙްމަދު ޝިޔާމް މުޙައްމަދެވެ.

މި ކޮންފަރެންސްގައި ރާއްޖޭގެ ވަފުދުގައި މިނިސްޓަރ ޝިޔާމްގެ އިތުރުން، މިނިސްޓަރ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޮލޮޖީ ޑރ. ޠާރިޤް އިބްރާހީމްވެސް ބައިވެރިވެ ވަޑައިގަންނަވައެވެ.

މި މުހިންމު ކޮންފަރެންސްގައި ދިވެހިރާއްޖެއިން ކަނޑުގެ މުއްސަނދިކަން ދެމެހެއްޓެނިވި ގޮތެއްގައި ބޭނުންކުރުމަށާއި ރައްކާތެރިކުރުމަށް މުހިންމު އިޢުލާނުތަކެއް ކުރާނެ ކަމަށް ވަނީ ހާމަކުރައްވާފައެވެ.

ކަނޑުތަކާއި ސަމުދުރުތަކުގެ ދެމެހެއްޓެނިވި ދިރުން ރައްކާތެރިކޮށް، މި މުހިންމު ވަސީލަތް މުސްތަޤްބަލުގެ ޖީލުތަކަށް ރައްކާތެރިކޮށްދިނުމަށް ބޭއްވޭ މި ކޮންފަރެންސްގައި ދުނިޔޭގެ އެކި ޤައުމުތަކުން ގިނަ އަދަދެއްގެ މަންދޫބުން ބައިވެރިވެ ވަޑައިގަންނަވައެވެ.

ކަނޑުތަކާއި ސަމުދުރުތަކުގެ ދިރުންތައް ރައްކާތެރިކުރުމަށް ދިވެހިރާއްޖެއިން ކުރަމުންދާ މަސައްކަތްތަކާއި، މި ދާއިރާއިން ރާއްޖެއިން ހާސިލުކޮށްފައިވާ ކާމިޔާބީތައް މި ކޮންފަރެންސްގައި ހިއްސާކުރެވޭނެއެވެ.