މާލޭގެ އެކި ސަރަހައްދުތަކުގައި މަގުތައް މަރާމާތުކުރުމުގެ މަސައްކަތް ދަނީ ކުރިއަށް
މާލެ ސިޓީ ކައުންސިލްގެ މުވައްޒަފުން
މާލެ ސިޓީ ކައުންސިލުން ކުރިއަށްގެންދާ "ހިތްފަސޭހަ މަގުމަތި" މަޝްރޫޢުގެ ދަށުން މާލޭގެ އެކި ސަރަހައްދުތަކުގައި މަގުތައް މަރާމާތުކުރުމުގެ މަސައްކަތް ދަނީ ކުރިއަށެވެ.
މި މަޝްރޫޢުގެ ދަށުން މަޖީދީމަގުގެ ހެންވޭރު ސަރަހައްދުން ފެށިގެން މައްޗަންގޮޅި ސަރަހައްދާ ހަމައަށް ޕޭވްމަންޓުން ހަލާކުވެފައިވާ ސަރަހައްދުތައް ވަނީ މަރާމާތުކޮށް ނިންމާފައެވެ. މީގެ އިތުރުން މއ. މާފަތްތަކުރުފާނު މަގުގައި ގަނބައިފައިވާ ސަރަހައްދުތައްވެސް ވަނީ މަރާމާތުކޮށް ރަނގަޅު ކޮށްފައެވެ.
އަދި ހ. މަޒާރާގެ ކުރިމަތީގައި ވީލްޗެއަރ ރޭމްޕެއް ވަނީ އަޅާފައެވެ. މިއީ ޚާއްސަ އެހީއަށް ބޭނުންވާ ފަރާތްތަކަށް ފަސޭހައިން ދަތުރުފަތުރު ކުރެވޭނެ ގޮތް ހެދުމަށް އެޅި ރޭމްޕެކެވެ.
މާލެ ސިޓީ ކައުންސިލުން މަގުތައް މަރާމާތުކުރުމުގެ މަސައްކަތް ކުރިއަށް ގެންދަނީ ރައްޔިތުންނަށް ހިތްފަސޭހަ މާހައުލެއް ޤާއިމްކޮށްދިނުމުގެ މަޤްޞަދުގައެވެ. މި މަސައްކަތްތަކުގެ ސަބަބުން މަގުމަތީގައި ހިނގާބިނގާވެ އުޅޭ ފަރާތްތަކަށް ލުއިފަސޭހަވެގެންދާނެ ކަމަށް ކައުންސިލުން ބުނެއެވެ.
މާލެ ސިޓީ ކައުންސިލުން މަޢުލޫމާތު ދެއްވާގޮތުގައި "ހިތްފަސޭހަ މަގުމަތި" މަޝްރޫޢުގެ ދަށުން މާލޭގެ އެހެން ސަރަހައްދުތަކުގެ މަގުތައްވެސް މަރާމާތުކުރުމުގެ މަސައްކަތް ކުރިއަށް ގެންދާނެއެވެ.
Republic of Maldives
ކޮމެންޓް