ޅ.ހިންނަވަރުގައި ބޮޑު ޖަމާއަތުގައި އީދު ނަމާދު ކޮށްފި

މިއަދު ހެނދުނު ޅ.ހިންނަވަރުގައި 1446 ވަނަ އަހަރުގެ އަޟްޙާ ޢީދު ނަމާދު ބޮޑު ޖަމާއަތުގައި ކުރިއަށް ގެންގޮސްފިއެވެ.

މި ނަމާދުގައި ރަށުގެ ގިނަ އަދަދެއްގެ ރައްޔިތުން ބައިވެރިވެ، އުފާވެރި މާހައުލެއްގައި އީދު ދުވަހުގެ އަޅުކަން ފުރިހަމަކޮށްފައިވެއެވެ.

އީދު ނަމާދަށްފަހު ރަށުގެ ރައްޔިތުންނަށް ޚާއްޞަ އީދު ސައެއް ބޭއްވުނެވެ. މި ސައިގައި ރަށުގެ އެކި އުމުރުފުރައިގެ ގިނަ އަދަދެއްގެ ރައްޔިތުން ބައިވެރިވެ، އެކުވެރިކަމާއެކު ވަގުތު ހޭދަކުރިއެވެ. މި ސައިގެ މާހައުލުގައި ރައްޔިތުން އެކަކު އަނެކަކަށް ހެޔޮއެދުންތައް ފޯރުކޮށްދިންކަން ފާހަގަކުރެވެއެވެ.

މި އަހަރުގެ އީދު ފާހަގަކުރުމުގެ ޙަރަކާތްތަކުގެ ތެރޭގައި ތުއްތު ކުދިންނަށް އީދު ހަދިޔާ ދިނުމުގެ ޚާއްޞަ ޕްރޮގްރާމެއް ކުރިއަށް ގެންދެވުނެވެ. މި ޕްރޮގްރާމްގައި ރަށުގެ ކުޑަކުދިންނަށް އުފާވެރި ވަގުތުކޮޅެއް ހޭދަކުރުމުގެ ފުރުޞަތު ލިބިގެން ދިޔައެވެ.

އީދު ނަމާދަށްފަހު 1446 އުޟްޙިޔާ ކަތިލުމުގެ ކަންތައްތައް ވެސް ކުރިއަށް ގެންގޮސްފައިވެއެވެ. މި އަހަރުގެ އީދު ފާހަގަކުރުމުގައި ރަށުގެ ހުރިހާ ފަރާތްތަކުން ވެސް ފުރިހަމަ އެއްބާރުލުން ދީފައިވާކަން ޚާއްޞަ ގޮތެއްގައި ފާހަގަކުރެވެއެވެ.