އައިލޭންޑް އޭވިއޭޝަންގެ ދަރަނި 2 ބިލިއަނަށްވުރެ ބޮޑު: އަމީން

2023 ވަނަ އަހަރު ނިމުނުއިރު އައިލޭންޑް އޭވިއޭޝަންގެ ދަރަނި 2 ބިލިއަނަށްވުރެ ބޮޑު ކަމަށް ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވެއްޖެއެވެ.

ރާއްޖެއަށް ވައިޑް ބޮޑީ އެއާކްރާފްޓް އޮޕަރޭޝަން އިފްތިތާހު ކުރުމަށް ބޭއްވި ރަސްމިއްޔާތުގައި އަމީން ވިދާޅުވީ އައިލޭންޑް އޭވިއޭޝަންއަކީ 4 މިލިއަން ރުފިޔާގެ ޕެއިޑްއަޕް ކެޕިޓަލަކުން އުފެއްދި ދައުލަތުގެ 100 ޕަސެންޓް ހިއްސާ އޮތް ކުންފުންޏެއް ކަމަށެވެ.

ކުންފުނި އުފެދުނީއްސުރެ 2018 ވަނަ އަހަރު ނިމުމާހަމައަށް ކުންފުނި ކުރިއަރާފައި ވަނީ ރަނގަޅު މިސްރާބެއްގައިކަން ފާހަގަ ކުރައްވާ އަމީން ވިދާޅުވީ އެހެން ނަމަވެސް 2023 ނިމުނުއިރު (5 އަހަރު ތެރޭގައި) ކުންފުނީގެ ދަރަނި 2 ބިލިއަނަށްވުރެ މައްޗަށް ގޮސްފައިވާ ކަމަށެވެ.

އަމީން ވިދާޅުވީ ކުންފުނީގައި އޮތް އެންމެ ރަނގަޅު އެއް އެއާބަސް (A321) 2022 ވަނަ އަހަރު އެތައް މިލިއަން ޑޮލަރަކާއެކު ހަރަދުކޮށް "ރިޓާން ކޮންޑިޝަނަށް" ގެނެސް އެ ބޯޓު ވެސް އޮތީ ދޫކޮށްލާފައި ކަމަށެވެ. އަދި ބޭނުން ކުރަމުންދިޔަ ޑޭޝް-8 މަރުކާގެ މަތިންދާބޯޓުތަކުގެ ތެރެއިން ސްޕެއާ ނަގަމުން ނަގަމުން ގޮސް 2023 ވަނަ އަހަރު ނިމުނުއިރު 4 މަތިންދާބޯޓު ބޭނުން ނުކުރެވޭ ހާލަތަށް އައިސްފައިވާ ކަމަށް އަމީން ވިދާޅުވިއެވެ.