އޮފީސް މާހައުލުގައި ނަފްސާނި ދުޅަހޮޔޮކަމަށް ވަގުތުކޮޅެއް ހުސްކޮށްލުން ވަރަށް މުހިންމު: ވަޒީރު ޑރ. މަރްޔަމް މާރިޔާ
ވަޒީރު ޑރ. މަރްޔަމް މާރިޔާ މުވައްޒަފުންނާއެކު
ޖިސްމާނީ ދުޅަހެޔޮކަމަށް ސަމާލުކަންދޭ ފަދައިން، ނަފްސާނީ ދުޅަހެޔޮކަމަށްވެސް ސަމާލުކަން ދޭންޖެހޭކަން ހަނދާންކޮށްދޭ ދުވަހެއްކަމަށް ވިދާޅުވި
މަސައްކަތުގެ މާހައުލުގައި ކިތަންމެ ބުރަކޮސް މަސައްކަތް ކުރިނަމަވެސް ތިމާގެ ނަފްސަށް ކުޑަ ވަގުތުކޮޅެއް ހުސްކޮށްލުމަކީ ވަރަށް މުހިންމުކަމެއްކަމަށް މަތީތައުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާއި ބެހޭ ވަޒީރު ޑރ. މަރްޔަމް މާރިޔާ ވިދާޅުވެއްޖެއެެވެ.
މިއަދަކީ ދުނިޔޭގެ ފެންވަރުގައި ފާހަގަކުރާ ނަފްސާނީ ދުޅަހެޔޮކަމުގެ ދުވަހެވެ. މިއަދުގެ މުނާސަބަތުގައި މި މި ވުޒާރާގައި ވަނީ ހަރަކާތްތަކެއް ހިންގާފައެވެ. އެގޮތުން ދުވަސްފެށު،މުގެ ގޮތުން ބޭއްވި ހަރަކާތުގައި ވަޒީރު ވަނީ މުވައްޒަފުންނަށް މަސައްކަތުގެ މާހައުލާ ގުޅޭގޮތުން މެސެޖެއް ދެއްވާފައެވެ.
ވަޒީރު ވިދާޅުވީ މިއަހަރުގެ ޝިއާރަކީ އަޅުގަނޑުމެން އެންމެންނަށްވެސް އަސަރުކުރާ ކަމެއްކަމަށެވެ. އެއީ "މަސައްކަތުގެ މާހައުލުގައި ނަފްސާނީ ދުޅަހެޔޮކަން" ކަމަށް ވާތީކަމަށާ، އަޅުގަނޑުމެން ޖިސްމާނީ ދުޅަހެޔޮކަމަށް ސަމާލުކަންދޭ ފަދައިން، ނަފްސާނީ ދުޅަހެޔޮކަމަށްވެސް ސަމާލުކަން ދޭންޖެހޭކަން ހަނދާންކޮށްދޭ ދުވަހެއްކަމަށް ވިދާޅުވިއެވެ.
"ތެދުތެދަށް ދަންނަވަންޏާ، މަސައްކަތުގެ މާހައުލަކީ ބައެއްފަހަރު ނަފްސާނީގޮތުން ބުރަވެދާނެ ތަނެއް. ސުންގަޑިތަކާއި، ބައްދަލުވުންތަކާއި، ނުނިމޭ މަސައްކަތުގެ ލިސްޓުތައް - މިހުރިހާ ކަމެއް އެކުވުމުން ބުރަވޭ. އެހެންނަމަވެސް މުހިންމު ޕޮއިންޓަކީ: އަޅުގަނޑުމެންގެ ދިރިއުޅުމުގެ ގިނަ ވަގުތުތަކެއް ހޭދަކުރަނީ މަސައްކަތުގެ މާހައުލުގައި ކަމަށްވާތީ، މިތަނަކީ އަޅުގަނޑުމެންނަށް އުފެއްދުންތެރިވެވޭ އަދި އަމިއްލަ ނަފްސާމެދު ރަނގަޅު އިހްސާސްތަކެއް ކުރެވޭ ތަނަކަށް ވާންޖެހޭ" ވަޒީރު ޑރ. މަރްޔަމް މާރިޔާ ވިދާޅުވިއެވެ.
ވަޒީރު ވިދާޅުވީ އެންމެ ފުރަތަމަ ކަމަކަށް، އަޅުގަނޑުމެން އުޅޭގޮތާމެދު ހާމަކަންބޮޑު ގޮތެއްގައި ވާހަކަދެއްކޭ މާހައުލެއް އުފެއްދުން މުހިންމުކަމަށެވެ. އަޅުގަނޑުމެން އެންމެންނަށްވެސް ރަނގަޅު ދުވަސްތަކާއި ދެރަ ދުވަސްތައް އަންނާނެކަމަށާއި، އެފަދަ ދުވަހެއްގައި ތިމާގެ ނަފްސާނީ ހާލަތު ދެރަވެއްޖެނަމަ، އެކަން ބުނުމަކީ މައްސަލައެއް ނޫންކަމަށެވެ. އަދި ނަފްސާނީ ދުޅަހެޔޮކަމަށްޓަކައި ދުވަހެއް ބޭނުންވާނަމަ، އެދުވަސް ނެގުން މުހިންމުކަމެއްކަމަށްވެސް ވިދާޅުވިއެވެ.
"މަސައްކަތުގެ މާހައުލުގައި ހަނދާންކޮށް ބްރޭކް ނެގުން ވަރަށް މުހިންމު! ކުޑަ ހިނގާލުމެއް، އެހެން މުވައްޒަފަކާއެކު ވާހަކަދެއްކުމެއް، ނުވަތަ ހަމައެކަނި ފަސް މިނިޓަށް ސްކްރީނުން ދުރަށް ޖެހިލުން ވެސް ވަރަށް ބޮޑު ބަދަލެއް ގެނެސްދޭނެ. އަދި މަސައްކަތް ނިމުމަށްފަހު އޮފީސް މަސައްކަތުން ދުރުވުމަށް ހަނދާންކުރޭ. އަޅުގަނޑުމެން އެންމެންނަށްވެސް ބޭނުންވަނީ އަލުން ހަކަތަ އާކުރާނެ ވަގުތެއް" ވަޒީރު ޑރ. މަރްޔަމް މާރިޔާ ވިދާޅުވިއެވެ.
މަސައްކަތުގެ މާހައުލުގައި އެކަކު އަނެކަކަށް އަޅާލުމަށް ވަޒީރު ވަނީ މުވައްޒަފުންނަށް ހިތްވަރު ދެއްވާ، އިލްތިމާސްކުރައްވާފައެވެ. އަދި އެހެން މުވައްޒަފުންގެ ހާލު ބަލައި ކޮށްދެވޭ ކުޑަކުޑަ އަމަލަކުން އަނެކާއަށް ވަރަށް ބޮޑު ބަދަލެއް ގެނެސްދޭނެކަން ފާހަގަކުރެއްވިއެވެ.
"މަސައްކަތުގެ މާހައުލުގައި ބުރަވެއްޖެކަމަށް ހީވާނަމަ، އެހީތެރިކަމަށް އެދުމަށް ފަސްޖެހިގެން ނުވާނެ. އެއީ މެނޭޖަރެއްގެ ކިބައިން ކަމުގައިވިޔަސް، ރަހުމަތްތެރިއެއްގެ ކިބައިން ކަމުގައިވިޔަސް، ނުވަތަ އަޅުގަނޑުމެންގެ އެހީތެރިކަމުގެ ޕްރޮގްރާމްތައް މެދުވެރިކޮށް ކަމުގައިވިޔަސްމެ" ވަޒީރު ޑރ. މަރްޔަމް މާރިޔާ ވިދާޅުވިއެވެ.
ވަޒީރު އިތުރަށް މުވައްޒަފުންގެ ކިބައިން އެދިލެއްވީ މި މަސައްކަތުގެ މާހައުލަކީ އަޅުގަނޑުމެން ހަމައެކަނި ބުރަކޮށް މަސައްކަތްކުރާ ތަނެއްގެ ގޮތުގައި ނުދެކި އެކަކު އަނެކަކުގެ ދުޅަހެޔޮކަމަށް އެހީތެރިވާ ތަނެއްގެ ގޮތުގައި ބާއްވަން ބާރުއެޅުމަށެވެ.
Republic of Maldives
ކޮމެންޓް