އިންޑިއާގެ އެހީގައި ސިވިލް ސާވިސްގެ އިތުރު 1،000 މުވައްޒަފުން ތަމްރީނު ކުރަނީ

އަވަށްޓެރި އިންޑިއާއަކީ ރާއްޖެއާ އެންމެ ގާތް އަދި ތަރައްގީގެ އެންމެ ބޮޑު އެއް ބައިވެރިޔާ ކަމަށް ޒަމީރު ވިދާޅުވި

އިންޑިއާގެ އެހީގައި ރާއްޖޭގެ ސިވިލް ސާވިސްގެ އިތުރު 1،000 މުވައްޒަފުން ތަމްރީން ކުރުމަށް ފަހުމުނާމާއެއްގައި ސޮއިކޮށްފިއެވެ.

ރާއްޖޭގެ ސިވިލް ސާވިސް ކޮމިޝަން (ސީއެސްސީ) އާއި އިންޑިއާގެ ނެޝަނަލް ސެންޓަ ފޯ ގުޑް ގަވަނަންސްއާ ދެމެދު މި ފަހުމުނާމާގައި ސޮއިކުރީ އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. ސުބްރަމާނިއަމް ޖަޔަޝަންކަރު މިހާރު ރާއްޖެއަށް ކުރައްވަމުން ގެންދަވާ ދަތުރުފުޅުގެ ތެރެއިންނެވެ. މި ފަހުމުނާމާގައި ސީއެސްސީގެ ފަރާތުން ސޮއިކުރެއްވީ އެ ކޮމިޝަންގެ ރައީސް މުހައްމަދު ނާސިހެވެ.

މިރަސްމިއްޔާތުގައި ޖައިޝަންކަރުގެ އިތުރުން ފޮރިން މިނިސްޓަރު މޫސާ ޒަމީރު ވެސް ބައިވެރިވެވަޑައިގެންނެވިއެވެ.

ރޭގެ މި ރަސްމިއްޔާތުގައި ވާހަކަފުޅު ދައްކަވަމުން ފޮރިން މިނިސްޓަރު މޫސާ ޒަމީރު ވިދާޅުވީ އަވަށްޓެރި އިންޑިއާއަކީ ރާއްޖެއާ އެންމެ ގާތް އަދި ތަރައްގީގެ އެންމެ ބޮޑު އެއް ބައިވެރިޔާ ކަމަށެވެ. ރާއްޖެ އާއި އިންޑިއާއާ ދެމެދު އޮތް ގުޅުން އެތައް އަހަރެއް ވަންދެން ދެމިގެން ގޮސްފައިވާ ކަން ޒަމީރު ވަނީ ފާހަގަކުރައްވާފައެެވެ.

މިނިސްޓަރު ޒަމީރު ވިދާޅުވީ ރާއްޖޭގެ ތަރައްގީގެ ބައިވެރިއެއްގެ ގޮތުގައި އިންޑިއާ ދެމި އޮތުމާ ގުޅިގެން ދިވެހި ރައްޔިތުން ވެސް ތިބީ ވަރަށް ބޮޑަށް ހިތްހަމަޖެހިފައި ކަމަށެވެ. އެގޮތުން ސިއްހީ ދާއިރާ، ތައުލީމީ ދާއިރާ، ޒުވާނުން، ކުޅިވަރު ދާއިރާ، ހައުސިން ފަދަ އެކިއެކި ދާއިރާތަކަށް އިންޑިޔާއިން ދޭ އެހީތެރިކަން ފާހަގަކުރައްވައި ޒަމީރު ވަނީ އިންޑިޔާ ސަރުކާރަށާއި ރައްޔިތުންނަށް ދިވެހި ސަރުކާރާ ރައްޔިތުންގެ ނަމުގައި ޝުކުރު އަދާކުރައްވާފައެެވެ.