50 އެނދުގެ ހޮސްޕިޓަލެއް އެޅުމަށް ރާވާފައި އޮތީ 200 މިލިއަނުން މަތިން: ޚަލީލް

ޚަލީލް ވާހަކަފުޅު ދައްކަވަނީ

މަޝްރޫއުތައް ހިންގަން ކަނޑައެޅި އަދަދަށްވުރެ ކުޑަ އަގެއްގައި މި ސަރުކާރުން އެކަންކަން ކޮށްދޭނެ

50 އެނދުގެ ހޮސްޕިޓަލެއް އެޅުމަށް ރާވާފައި އޮތީ 200 މިލިއަނުން މަތިން ކަމަށް ސިއްހަތާއި ބެހޭ ވަޒީރު ޑރ. ޢަބްދުﷲ ޚަލީލް ވިދާޅުވެއްޖެއެވެ.

ޕީއެންސީ އިން ސިލްސިލާކޮށް މިހާރު ބާއްވަމުންދާ ޖަގަހަ ޖަލްސާތަކުން ރޭގައި ބޭއްވުނު ޖަލްސާގައި ވާހަކަ ދައްކަވަމުން ޚަލީލް ވަނީ ރާއްޖޭގެ ސިއްހީ ދާއިރާގެ ކަންކަން ހުރި ގޮތާމެދު އަލިއަޅުވާލައްވާފައެވެ.

ޚަލީލް ވިދާޅުވީ، އާބާދީ ބޮޑެތި ރަށްރަށުގައި ހޮސްޕިޓަލްތަކެއް އަޅާނެ ކަމަށް ބުނެ އޭރުގެ ސަރުކާރުން ސިއްހީ ދާއިރާއަށް ބަދަލުތަކެއް ގެންނާނެ ކަމަށް ވައުދުވި ކަމަށެވެ. ނަމަވެސް އެ ވައުދުތައް ވީ ބަޖެޓުގައި އެކަމަށް ފައިސާ ހުރިކަން ޔަގީން ނުކޮށް ރިޔާސީ އިންތިހާބާއި ދިމާކޮށްކަމަށް އޭނާ ވިދާޅުވިއެވެ.

އަދި އޭގެ ތެރެއިން ބައެއް މަޝްރޫއުތައް ހީވީ މާދަމާ ފަށާފާނެހެން ކަމަށާއި ނަމަވެސް، އެކަންކަން އެގޮތަށް ކުރިއަށް ގޮސްފައި ނެތްކަމަށެވެ. އަދި އެހެން ދިމާވީ ދައުލަތުގައި އެ ހަކަތަ ނެތްއިރު އެކަން ކުރަން އުޅުމުންކަމަށް ޚަލީލް ވިދާޅުވިއެވެ.

ޚަލީލް ވިދާޅުވީ، އޭރުގެ ސަރުކާރުން ހޮސްޕިޓަލްތައް އަޅަން ނިންމާފައި އޮތީ އެ މަސައްކަތްތައް އެއަށްވުރެ އެތައްގުނައެއް ކުޑަކޮށް ކުރެވެން އޮއްވާކަމަށެވެ. ހަލީލް ދެއްވި ޔަގީންކަމަކީ މިދިޔަ ސަރުކާރުން މަޝްރޫއުތައް ހިންގަން ކަނޑައެޅި އަދަދަށްވުރެ ކުޑަ އަގެއްގައި މި ސަރުކާރުން އެކަންކަން ކޮށްދޭނެ ކަމެވެ.

ޚަލީލް ވިދާޅުވީ މި ސަރުކާރު ވެރިކަމާ ހަވާލުވިއިރު ސިއްހީ ދާއިރާއާއި ގުޅޭ 57 މަޝްރޫއެއް ހަވާލުކޮށްފައި އޮތްނަމަވެސް އޭގެ ތެރެއިން 34 މަޝްރޫއެއް އޮތީ ހުއްޓިފައި ކަމަށެވެ. އެހެންކަމުން ކޮންޓްރެކްޓަރުންނާއިއެކު ކުރެވުނު މަޝްވަރާތަކަށްފަހު ޖުމުލަ 20 މަޝްރޫއެއްގެ މަސައްކަތް މިހާރު އަލުން ފެށިގެން ކުރިއަށް ދާކަމަށް އޭނާ ވިދާޅުވިއެވެ.

ކޮމެންޓް

Newsroom
Phone: +(960) 9330706
Email: newsroom@minutes.mv
Marketing
Phone: +(960) 9330706
Email: marketing@minutes.mv
H.Delas, Sosun magu, Male
Republic of Maldives
© 2024 Minutes Online. All rights reserved.