ރަސްގެތީމުގެ ތަރައްޤީގެ މަޝްރޫޢުތައް މިއަހަރު ތެރޭ ފެށުމަށް ރައީސް ވަޢުދުވެއްޖެ

ރ. ރަސްގެތީމުގެ ތަރައްޤީއަށް ކުރަންހުރި މަސައްކަތްތައް މިއަހަރު ތެރޭގައި ބާރު ދުވެލީގައި ކުރިއަށް ގެންދަވާނެކަމުގެ ޔަޤީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވައިފިއެވެ.

މިކަން އެމަނިކުފާނު ހާމަކުރެއްވީ މާޅޮސްމަޑުލު އުތުރުބުރީގެ ބައެއް ރަށްތަކަށް ކުރައްވަމުންގެންދަވާ ދަތުރުފުޅުގެ ތެރެއިން ރަސްގެތީމު ރައްޔިތުންނާ ބައްދަލުކުރެއްވުމަށްފަހުއެވެ.

ރައީސް މުޢިއްޒު ވިދާޅުވި ގޮތުގައި، "މި ސަރުކާރުގެ އަމާޒަކީ ރިޔާސީ ކެމްޕޭންގައި ވެފައިވާ ހުރިހާ ވަޢުދުތަކެއް މި އަހަރު ތެރޭގައި ފަށައި، ބައެއް މަޝްރޫޢުތައް ނިންމުން" ކަމަށެވެ. މިގޮތުން ރަސްގެތީމުގެ ބަނދަރު ހެދުމުގެ މަސައްކަތާއި، ސްކޫލްގެ ކްލާސްރޫމްތަކާއި ހޯލުގެ މަސައްކަތް މި އަހަރު ތެރޭގައި ނިންމަވައިދެއްވާނެ ކަމުގެ ޔަޤީންކަން ދެއްވިއެވެ.

އަދި ހަމަ އެހެންމެ، ކުޅިވަރުގެ ވަސީލަތްތައް ޤާއިމުކުރުމާއި، ކުނި ނައްތާލުމުގެ ނިޒާމު ހަރުދަނާކުރުމާއި، ސިއްޙީ ދާއިރާގައި ހުރި ގޮންޖެހުންތައް ޙައްލުކުރުމުގެ މަސައްކަތްތައް ކުރިއަށް އޮތް މަސްތަކުގެ ތެރޭގައި ފެށިގެންދާނެ ކަމަށް ރައީސް އިޢުލާނުކުރެއްވިއެވެ.

މި ދަތުރުފުޅުގައި ކަމާބެހޭ ވަޒީރުންނާއި، ކައުންސިލް އަދި އަންހެނުންގެ ތަރައްޤީއަށް މަސައްކަތްކުރާ ކޮމެޓީއާއެކު ފުޅާ ދާއިރާއެއްގައި މަޝްވަރާތައް ކުރެވުނު ކަމަށް ރައީސް ފާހަގަކުރެއްވިއެވެ. މީގެއިތުރުން، މި ބައްދަލުވުމުގައި ބޭންކް އޮފް މޯލްޑިވްސްއިން ރަށުގައި އޭޓީއެމް ބެހެއްޓުމުގެ މަސައްކަތް ރަސްމީކޮށް ރަށު ކައުންސިލާ ހަވާލުކުރެވުނެވެ.

ރައީސް މުޢިއްޒު ވަނީ މި އަހަރު ނިމޭއިރު ރަށުގެ މައްސަލަތަކަށް ޙައްލު ލިބި، އެކަމުގެ އުފާ ފާޅުކުރާ ދަނޑިވަޅުގައި، ރައްޔިތުން އެދިވަޑައިގަންނަވާނަމަ، މަޝްރޫޢުތަކުގެ ނިމުން ފާހަގަކުރުމަށް އަލުން ރަސްގެތީމަށް ވަޑައިގަންނަވާނެ ކަމުގެ ޔަޤީންކަންވެސް ދެއްވާފައެވެ.